Nigeria TV Info — Mutane Biyu Sun Rasu a Mummunan Girgizar Ƙasa Mai Ƙarfi Ta Girgiza Kudancin Philippines

Manila, Philippines — Aƙalla mutane biyu ne aka tabbatar da rasuwarsu bayan wata mummunar girgizar ƙasa mai ƙarfi wato magnitude 7.4 ta auku a gabar kudancin Philippines da yammacin ranar Alhamis, in ji hukumomi.

Karlo Puerto, jami’in bayanai na ofishin kare fararen hula na yankin Davao Region, ya tabbatar da cewa waɗanda suka mutu mazauna ne na garin Mati City a jihar Davao Oriental, ɗaya daga cikin wuraren da suka fi kusa da tsakiyar girgizar ƙasar.

Rahotanni na farko sun nuna lalacewar gidaje, gine-gine da gada a wasu sassan yankin. Sai dai jami’ai sun ce har yanzu ana tantance girman asarar da ta auku a yankunan da abin ya shafa.

Girgizar ƙasar, wacce ta zo da ƙarfi sosai, na ɗaya daga cikin mafiya muni da suka taba afkawa Philippines a cikin ‘yan shekarun nan. Wannan ƙasa ta kudu maso gabashin Asiya tana cikin “Zoben Wuta na Pasifik (Pacific Ring of Fire)”, wani yanki da ke da yawan aukuwar girgizar ƙasa da fashewar duwatsu masu aman wuta, inda ake samun sama da girgizar ƙasa 800 a kowace shekara.

Lamarin ya faru ne bayan makonni biyu da Philippines ta fuskanci mafi mummunan girgizar ƙasa cikin shekaru fiye da goma — girgizar ƙasa mai ƙarfi 6.9 da ta auku a tsibirin Cebu ta tsakiya, inda mutane aƙalla 74 suka mutu.

Hukumomi sun yi gargadin jama’a da su ci gaba da kasancewa cikin shiri, domin ana sa ran girgizar ƙasa ta biyo baya (aftershocks) za su ci gaba a kwanaki masu zuwa, yayin da ƙungiyoyin gaggawa ke ci gaba da lura da halin da ake ciki da kuma taimaka wa iyalan da abin ya shafa.